Friday 19th of October 2018   

«

»

Print this نوشته

د انسانیت تعریف

6040

لیکوال : نثار احمد صمد

  

یو چا د احنف بن قیس (رح) څخه وپوښتل چی انسانیت یعنی څه ؟ داسی یې ورته وفرمایل :

۱ : تواضع کول ، سره له دې چی شتمنی او ثروت ولری ؛

۲ ـ عفو کول ، سره له دې چی د بدل او انتقام قدرت ولری ؛

۳ ـ د خلکو سره دوستی او مرسته کول ، بېله کوم منت څخه ؛

۴ ـ د قهر او غوصې پر مهال د تلوار پر ځای د صبر  او زغم څخه کار اخیستل .

البته په صبر کولو کی درې ګټی نغښتی دی :

لومړی ـ له امله یې خوښی او نیکمرغی منځته راځی ؛

دوهم ـ له امله یې ټول خلک ستاینه کوی ؛

درېیم ـ له امله یې د الله په دربار کی تر ټولو ښه اجر او ثواب ګټی .

خو په تلوار او عجله کی یې دغه زیانونه پیښیږی :

لومړی ـ له امله یې پښېمانه او سرځوړﺉ کیږی ؛

دوهم ـ له امله یې هر څوک ملامت او بد بولی ؛

درېیم ـ له امله یې د الله په دربار کی تر ټولو بده سزا ورکول کیږی ؛

الحِلمُ اوَله مُر مذاقته لکن آخِرهُ احلی مِن العسل « د صبر مزه لومړی ډیره ترخه وی لاکن په پای کی تر عسلو هم خوږه وی . »

هو ، انسان هم چی ناروغ سی د جوړتیا لپاره یې دوا ترخه وی ، په مشکل سره یې خوری او تندی یې تریو نیولی وی . پوښتنه دا ده چی ولی دغسی کوی ؟ دا ځکه چی انجام او عاقبت یې مدنظر نیولی وی چی هغه روغتیا ، شفا او سلامتیا ده . مؤقتأ پر ځان دغسی تکلیف او عذاب تیروی خو راتلونکې یې سمه او سالمه وی . نو څومره به ښه وی چی موږ هر څوک دغسی عارضی او مؤقتی تکلیف پر ځانونو تیر کړو تر څو نهایی ثمره یې خوږه وی ، انشاالله .

منبع : د لیکوال اثر : ( اخلاقی کنایې ـ لومړی جلد ؛ ۲۰۱۲ ) ؛  ۳۲۴ ـ ۳۲۵ مخونه .

Permanent link to this article: http://my.azmoone-melli.com/go/4021